בס"ד
ישעיהו פרק מג
ועתה כה-אמר יהוה, בוראך יעקוב, ויוצרך, ישראל:
אל-תירא כי גאלתיך, קראתי בשמך לי-אתה.
כי-תעבור במים איתך-אני, ובנהרות לא ישטפוך:
כי-תלך במו-אש לא תיכווה, ולהבה לא תבער-בך.
כי, אני יהוה אלוהיך, קדוש ישראל, מושיעך;
נתתי כופרך מצריים, כוש וסבא תחתיך.
מאשר יקרת בעיניי נכבדת, ואני אהבתיך;
ואתן אדם תחתיך, ולאומים תחת נפשך.
אל-תירא, כי איתך-אני: ממזרח אביא זרעך, וממערב אקבצך.
אומר לצפון תני, ולתימן אל-תכלאי;
הביאי בניי מרחוק, ובנותיי מקצה הארץ.
כל הנקרא בשמי, ולכבודי בראתיו: יצרתיו, אף-עשיתיו.
הוציא עם-עיוור, ועיניים יש; וחירשים, ואוזניים למו.
כל-הגויים נקבצו יחדיו, ויאספו לאומים--
מי בהם יגיד זאת, וראשונות ישמיעונו;
ייתנו עדיהם ויצדקו, וישמעו ויאמרו אמת.
אתם עדיי נאום-יהוה, ועבדי אשר בחרתי:
למען תדעו ותאמינו לי ותבינו, כי-אני הוא--לפניי לא-נוצר אל,
ואחריי לא יהיה.
אין תגובות:
הוסף רשומת תגובה
מאת:
תגובה: